2Filii hominum, usquequo gravi corde ? Ut quid diligitis vanitatem, et quæritis mendacium ?

3Et scitote quoniam mirificavit Dominus sanctum suum ; Dominus exaudiet me cum clamavero ad eum.

4Irascimini, et nolite peccare ; quæ dicitis in cordibus vestris, in cubilibus vestris compungimini.

5Sacrificate sacrificium justitiæ, et sperate in Domino. Multi dicunt : Quis ostendit nobis bona ?

6Signatum est super nos lumen vultus tui, Domine : dedisti lætitiam in corde meo.

7A fructu frumenti, vini, et olei sui, multiplicati sunt.

8In pace in idipsum dormiam, et requiescam ; quoniam tu, Domine, singulariter in spe constituisti me.